" आगोलाव गथ'फोर गेलेनायनि खान्थि"

गथ'फोरनि गेलेनायफोरखौ सोलायबोबाय थानाय नुनो मोन्दों। गथ'फोरनि गेलेनाय सोलाइबोनायनि जाहोनफोरखौ सम आरो मुगायानो सोलायहोबोदों होनना  बुंनो हायो। गथ'फोरा जि सम आरो मुगायाव गावसोरनि आबहावायाव जिखौ मोन्दों बेखौ गेलेनाय नुनो मोन्दों। बेखायनो, गोदोनि गथ'फोर गेलेनायफोरखौ आथिखालनि गथ'फोरखौ बारा गेलेनाय नुनो मोनला। खायसे गेलेनायखौ गारथारबाय। आथिखाल गेलेनाय नुनो मोनला। बेफोर जेखि जादोला आं गोदानि गथ'फोर गेलेनाय आरो बेनि नेमफोरखौ मोन्नै रायखांनो नाजानाय जाबाय। 

दावब' गेलेनाय: बेखौ गेलेनो थाखाय गेलेग्राफोरनि गेजेरनिफ्राइ सासेया दावब' जायो। दावब' जानाय गेलेगिरिया गंसे हासिब गनसिखौ गोलावैनो लानानै फारसे बिजोखौ थाम इनसिसो गोलाव सिफायदबनानै दावब'  खुगा बायदि खंखाय खालामनानै लायो। माखासेया आखाइ मुथा मोजोम-मोजोम फज'-फज' लायो। सासे मानसिया हासिब गनसि गुसुं खेबस'ना लानानै आसि बिजौ मोननै एबा मोन्थामजों लाखोमानानै गाहायनि मेथायखौ रोजाब-रोजाब लोगोफोरनि आखाय मोजोमनाय मुथायाव थुयै-थुयै दोनखोमागोन। आखाइ मोजोम-मोजोम फाथिनालानाय लानाय लोगोफोराबो गाव-गावनि आखाइखौ थुखांब्लानो मोजांङै मोजोमनानै लाफिनो जाहाथे दावब'वा नुनो मोना। हासिब गनसि दोनखोमानो थुग्राखौ बिमाबो होनना बुंनाय जायो। बिमाया गावनि गोसोबायदियै मेथायखौ रोजाबै-रोजाबै सिरिनै सिरिथामबो फिदिंनो (गिदिंनो) हागौ। बिमाया दोनखोमानाया जाबाय होननानै आखाइजों इसारा होब्ला दावब' जानाय गेलेगिरिया गनसिखौ बबाव दोनखोमादों बेखौ संनांगौ।