"बर'फोरनि गोदोनि गामियारि गेलेनाय"

गेलेनाया सुबुंनि जिउनि गोनांथार आयदा।गेलेनाया सुबुंनि देहाखौ गोगो आरो  थाजिम खालामो। बेनि अनगायैबो मेलेम आरो थैखौ सांग्रां खालामो। गेलेनायजों सासे सुबुङा गावनि जिउखौ गोजोनै खुंलांनोबो हायो।गावनि जिउखौ दानायजों लोगोसे गावनि मुंखौ मिथिसार होनायनि अनगायैबो रायजो एबा हादोनि थाखाय गोबां मुं खालामनो हायो।       बर'फोरा समाज खुंनानै रायजो जाग्रा हारि। गोदो-गोदाय बर'फोरा गामि-गामि गोबां खेला गेलेदोंमोन। गामियारि गेलेनाया सुबुं जिउजों एंगारनो हायैबादि सरजाबना थायो। मावनानै जाग्रा बर' सुबुंफोरा मावनाय दांनायनिफ्राय जेब्लानो सम मोनो अब्लानो जिरायो आरो बायदि रोखोनि गेलेनायखौ गेलेयोमोन। सुबुङा बयबो गोसोनि दुखु दाहा, मेंनायखौ बावनानै गोदान सांखान्थिजों गावनि हाबायाव नांफिननो थुलुंगा मोनो आरो लोगोसे खहाबगोनां रंजानो मोननाय खेलाफोरखौ गेलेयो। गोदानि गेलेनायफोराव दानि बादि बान्था एबा रां मोनामोन नाथाय देरहानायनि देरगानायानो बिसोरनि रंजानायमोन।बर'फोरनि गामि ओनसोलफोराव गेलेनाय खेलाफोरखौ आथिखालाव नुनो मोनलाखौनो बुंजायो। खायफा-खायफा ओनसोलफोराव मिरौ-जिरौ थांना दं। 

       बर'फोरनि गेलेनायनि थाखोखौ गाहायै मोननै थाखोआव मोननो हायो।   

(क)बैसो गोराफोरनि गेलेनाय आरो (ख)बैसो उन्दैफोरनि गेलेनाय 

      बर' गामिफोराव बांसिनै बैसो उन्दैफोरखौसो गेलेनाय नुनो मोनो। बैसोगोराफोरा जिउ खुंनायाव गोनांथार सम होनांगौ जानायलाय गेलेनो सम मोना। जा ऐसे सम मोनो बेवहाय मेंनाय देहाखौ आराम लानो सानो। थेवब्लाबो खायफा मेंनाय देहाखौ बावगार होनो थाखाय गेलेयो। गुबुन फ़ारसेथिं गोरलै बैसोनि सुबुंफोरा न'खरनिबायदि खमानिजों नांथाबना थानाङिनि थाखाय गेलेनो गोबां सम मोनो