: आंहा गायखांबाय। थौदो थांदिनि - गोदोनि खोथा गोसो खांबाय थानाय समाव खाथियाव फैनानै दाबारिया न'आव थांनो लिंबाय।
बिसि लिंनायावसो सम थांनायखौ हमनो हाबाय। अख्रांआव नायदावबाय। नुबाय, माब्लाबानो सानजौफु जाबाय। थाब गायखांगोन साननानै ओंखाम-ओंख्रि संनानै गारबोआखै। नाथाय गाव गायफैलाय फोजोबनो सम नांबाय। हंलाया सानबाय ओंखाम उखैनानै गथ'फोरा दाहा लागै आयखां-बायखां जाबाय।
थाङै थाङै बिसोर न' खाथि मोनबाय।
नुबाय दहाय फुंङाव खारबोनाय गारिया बिनि दरखं मोखाङाव दं। लांथिया-बाथिया बिनि फिसाफोरा गिदिं गिदिं गारि नायगासिनो दं। खामसालियाव नुबाय बैसो जानाय हौवा-हिन्जाव सानैया खामफ्लाइयाव जिरायनानै दं। नुनानै सोर जाखो सानबाय।
: आबालै, गुवाहाटीनि आबै-आबौ फैदों। -खारबोनानै खिन्थाबाय फिसाज्ला देरसिना।
दिउ दिउ रागा जोंबाय हंलाया नाथाय रागा हमथानानै सिरि थाबाय। उनाव बिबथैनि खाथियाव थांबाय।
: गायखांबाय हंला ? -बिबथैया सोंबाय।
: गायखांङाखै आदै। नोंनि हाखौ ग़ायबावनो दं- फिन होबाय हंलाया।
बे समावनो दाबारिया बिबथैखौ खुलुमबाय। बिमादैखौबो खुलुमबाय। उनाव फिसा उन्दैसिननि आखाइ हमनानै खाथियाव गसंबाय।
: गथ'फोरा माथो गुंग्राय मिलौ जोबबाय -बिबथैआ बुंबाय।
: गुग्राय मिलौनि फिसाया गुंग्राय मिलौ जायाब्ला माथो जाबावनो आदै ? फिन होबाय हंलाया।
Comments
Post a Comment